மீடியாக்களை மிரள வைத்த 'கும்பல்' செய்தி!

2 ம் தேதி காலை பத்து மணிக்கு நம் கும்பல் பக்கத்தில் நாம் வெளியிட்ட செய்தி மிகுந்த பரபரப்பை ஏற்படுத்தியது. பத்து நாட்களுக்கும் மேலாக திவாகரனை தேடும் பணி தீவிரமாக நடந்துவந்த நிலையில், 'தொட்டுவிடும் தூரத்தில் திவாகரன்' என்ற தலைப்பில் நாம் எழுதி இருந்தோம். அதில், நாம் எழுதி இருந்த விவரங்கள் அப்படியே இங்கு மீண்டும் தரப்படுகிறது...

தொட்டுவிடும் தூரத்தில் திவாகரன்?!

பத்து நாட்களாக கண்ணாமூச்சி ஆடிய திவாகரன் ஒருவழியாக போலீஸ் கண்காணிப்பு வளையத்துக்குள் வந்துவிட்டார். அவருக்கு நெருக்கமான அத்தனை வட்டாரங்களையும் ஆராய்ந்து பார்த்து சலித்துப்பூன போலீஸ் அதிகாரிகள் கடைசியாக, திவாகரன் குடும்பத்தினரையே நீடாமங்கலம் போலீஸ் ஸ்டேஷனுக்கு அழைத்து வந்து மிரட்டத் தொடங்கினார்கள். அதற்கு உரிய பலன் உடனடியாகக் கிடைத்திருக்கிறது. தமிழகத்துக்கு வெளியே பதுங்கி இருந்த திவாகரன் போலீஸ் அதிகாரிகள் சிலரைத் தொடர்புகொண்டு பேசிவிட்டார். என்னென்ன வழக்குகள் போடுவீர்கள் என்பதைச் சொன்னால்தான் உங்களின் நடவடிக்கைக்கு உடன்படுவேன் என திவாகரன் சொல்ல, அதிகாரிகள் வழக்கு குறித்து விரிவாகச் சொல்லி இருக்கிறார்கள். அதன்படி, இன்றோ நாளையோ திவாகரன் கைது விவகாரம் உறுதியாக அறிவிக்கப்படும் எனத் தெரிய வருகிறது.

- கும்பல்


நாம் எழுதிய செய்தி இரண்டாம் தேதி இரவு 11 மணிக்கு உறுதியானது. வெளிமாநிலத்தில் பதுங்கி இருந்த திவாகரன் பொலிசாரிடம் பேசியபடி திருச்சியில் வந்து சரண்டர் ஆனார். திருச்சி புறநகர் பகுதி போலீசார் அவரிடம் விசாரணை நடத்தி வருகிறார்கள். பிரபல மீடியாக்களே திவாகரன் பிடிபட்ட தகவலை உறுதிப்படுத்த முடியாமல் திண்டாடிய நிலையில், நமக்குக் கிடைத்த மிக உறுதியான தகவலை வாசகர்களுக்கு அடுத்த கணமே வழங்கி இருந்தோம். நம் செய்தி அப்படியே உண்மையாகி இருப்பதை வாசகர்களுக்கு பெருமகிழ்வோடு தெரிவிக்கிறோம்!

- ஆசிரியர் குழு